Најчевска преку Фејсбук упати свој коментар на изјавите на Коп.
„Прво, холандскиот амбасадор ги надминува своите овластувања и се меша во внатрешните работи на државата.
Второ, во ниту еден момент не ја спомнува ДУИ како носител на континуитетот во криминалот и корупцијата.
Трето, со пасивниот однос кон Бугарија и нивните бесмислени барања, заедно со другите амбасадори отвори простор за дефокусирање на вниманието на граѓаните од реформите и концентрација околу наметнати уставни промени“, вели Најчевска.
Холандскиот амбасадор вчера ја искористи Втората регионална експертска конференција за Кластер 1 „Основни вредности“ во рамки на проектот „Правдата нека владее со регионот“, од која упати остри зборови за македонските политичари оценувајќи дека ништо вредно и конкретно не презеле на планот на евроинтеграцијата освен што бараат изговори и лоцираат вина и кај самите членки на ЕУ. Особено како шлаканица и кон актуелната и кон претходната власт прозвучи оваа негова изјава:
„Што правите вие, освен што натрупувате изговори за исполнување на барањата за членство. Зошто вие не ги завршивте своите реформи пред 15 години како и овие други земји? Слушам дека Европската унија е виновна дека членството е заедничка одговорност и дека ние премногу ве оставаме да чекате. Вистината е дека членството е ваша одговорност и вие нас не оставате да ве чекаме премногу. По децении огромна поддршка, каде отидоа парите на нашите даночни обврзници?“
Освен тоа, Коп посебен дел во своето обраќање посвети на корупцијата и судството, како и кон последиците од изменетиот Кривичен законик, па ќе се послужи и со латинска поговорка, : „Правдата нека се изврши дури и небото да пропаѓа“. Овие зборови, рече, се вградени во западната култура.
