Со измените, според Левица, ќе се овозможи обичниот работник да зема месечен паричен надоместок за време на привремена невработеност под еднавки услови како и т.н. апанажа, која им следува како класна привилегија на избраните и именуваните лица, односно на јавните функционери во државава.
„На ваков чекор се одлучивме предизвикани од вчерашното неподдржување од страна на пратениците на Предлог-законот, поднесен од Левица, за укинување на апанажата на функционерите. Таквото дејстување на, условно кажано, најголемите политички партии, е само продолжение на статус-квото, а против начелото на социјална правда. Дополнително, тоа нивно дејстување е недржавничко и претставува доказ дека за нив правата на обичниот работник за достоинствен живот се безвредни и единствена нивна партиска заложба е директна заштита на капиталот и привилегиите на мала група неспособни функционери“, пишува во соопштението од Левица.
Истовремено, од партијата апелираат до работниците и до синдикатите, јавно и отворено да го поддржат овој наш Предлог – закон и додаваат дека неговото поднесување е во насока на доследно почитување на уставното начело на забрана на дискриминација врз основа на имотна, социјална и општествената положба.
