Ковачевски го запознал Лајчак со заедничките активности со премиерот на Бугарија Кирил Петков за интензивирање на билатералната соработка и за работата на петте работни групи за економија, инфраструктура, култура, ЕУ интеграција и историја коишто имаат задача да изготват патоказ за спроведување на Договорот за пријателство.
Како што понатаму информира владината прес – служба, Лајчак упатил силна поддршка за интеграцијата на Македонија во ЕУ и ја оценил нашата земја како доверлив партнер на Унијата.
„Лајчак изрази и задоволство од досегашните заложби и ги оцени како значаен придонес кон конечната одлука за усвојувањето на Преговарачката рамка и за закажувањето на првата Меѓувладина конференција во мандатот на Република Франција како претседавач со Европскиот совет“, велат од Владата.
На средбата станало збор и за унапредувањето на регионалната соработка меѓу земјите од Западен Балкан, меѓу што и за охрабрувачкиот процес „Отворен Балкан”.
Во регионален контекст, премиерот Ковачевски истакнал дека Македонија ги поддржува сите форми на дијалог меѓу Белград и Приштина, а изразил и поддршка за суверенитетот и територијалниот интегритет на стабилна и безбедна Босна и Херцеговина во согласност со Дејтонскиот мировен договор.
