МНР информира дека Османи во Брисел ќе се обрати пред европратениците, членови на Комисијата за надворешна политика – АФЕТ, на покана на Претседателот на оваа Комисија, Дејвид Мекалистер, а ќе има средба и со „Пријателите на Северна Македонија” во Европскиот парламент, група која е составена од европратеници, поддржувачи во ЕП и кои доаѓаат од различни парламентарни групи во ЕП.
Дополнително во Европскиот парламент, Османи ќе има и други одвоени средби меѓу кои со известителот на Европарламентот за земјава, Илхан Kучук, со координаторот во Комитетот за надворешни работи (АФЕТ), Михаел Галер и со координаторот на социјалистите во АФЕТ, Тонино Пицула.
Во програмата се предвидени и средби на Османи со високи официјални претставници на европските институции, меѓу кои и со еврокомесарот за проширување и соседска политика Оливер Вархеи, а ќе се сретне и со својот чешки колега, Јан Липавски, велат од МНР.
„Клучна точка на разговорите ќе биде европското досие на Северна Македонија, регионалните случувања и политичките актуелности во државата, преку рефлексија на војната во Украина. Ќе стане збор и за доборососедските односи со фокус на разговорите со Бугарија и продолжувањето на реформските процеси со ЕУ предзнак“, се вели во соопштението на МНР.
