Во интервју за БГНЕС Павлов вели дека и самиот Крчовски велел дека пишувал на наједноставен бугарски јазик за да им биде поразбирлив на луѓето, бегајќи од т.н. стара бугарска норма.
„Целото негово творештво и целиот негов живот покажува дека се работи за бугарски просветител. Самиот Осоговски манастир, пак, секогаш бил центар на бугарската духовност не само во регионот на Крива Паланка, туку и во целиот регион на Ќустендил“, изјавил Павлов.
Според него, ова не е прв ваков случај на кражба. Павлов потсетува дека пред неколку години МПЦ го канонизираше монахот Кирил Пејчинович, а сега, според него, ист е случајот со Јоаким Крчовски. И двајцата биле бугарски преродбеници, слични на епископот Софрониј Врачански. Разликата, додава, е што Крчовски и Пејчинович ја „надминале“ територијата на денешна Македонија и „зафатиле“ и други бугарски земји во западните бугарски територии.
За Павлов ова е доказ дека во Македонската православна црква преовладуваат сили кои се против дијалогот со Бугарската православна црква и особено со Бугарија.
Тој ги повикува Бугарија и БПЦ да реагираат на ваквите кражби на историјата и додава дека БПЦ не треба да го остави нивното културно и духовно наследство во туѓи раце.
„Во овој случај во рацете на МПЦ која дејствува како туѓа црква. Всушност, се работи за две цркви – БПЦ и МПЦ, кои се наследнички на иста црква – Црквата на Првото бугарско кралство. Бугарската патријаршија има категоричен став дека е наследник на бугарската средновековна црква на целата нејзина етничка територија и дека е наследник и на Бугарската егзархија. Во исто време, гледаме дека ги остава личностите како Пејчиновиќ и Карчовски, кои се нашиот духовен капитал, на туѓи институции“, рече проф. Павлов.
Македонизацијата на Јоаким Карчовски – достоен Бугарин и претставник на бугарската преродба, тој ја опишува како трагичен чин. Според него, со оваа постапка МПЦ ги крши исконските правила на моралот и на самата христијанска вера.
За да се избегнат кражбите и навлегувањето во бугарското историско минато, Павлов предлага активно да се дејствува и ја повика БПЦ да ги канонизира браќата Миладиновци како маченици за верата и бугарштината.
„Тие навистина имаат маченичка смрт. Но, не се канонизирани со образложение дека ќе се иритира Вселенската патријаршија. Тоа се неодржливи тврдења“, вели Павлов.
