Тие, како што јавува МИА од Софија, ги поздравуваат конструктивните потези на новата бугарска влада и лично на премиерот Кирил Петков и се надеваат дека и Димитар Ковачевски и новата влада во Република Северна Македонија, доколку бидат избрани, ќе направат исти такви коректни и точни потези. Според авторите на писмото, барањата на Петков за проширување на односите меѓу Софија и Скопје со заеднички работни групи во различни области се можност да се потпрат на Договорот за добрососедство, кој треба да биде фундаментален за односите меѓу двете земји. Исто така, се додава дека ова ќе ѝ овозможи на Бугарија да ја врати својата корисна улога во пристапувањето на Македонија во Европската Унија, како и да ги поттикне аспирациите на другите земји од Западен Балкан за членство во ЕУ.
Авторите на писмото кое е поддржано од 185 граѓани, се надеваат дека идниот премиер на Македонија ќе ја поттикне македонската дипломатија и институции да заземат проактивна позиција за носење на неопходните одлуки во македонското општество и добрососедската политика со Бугарија – преку активен дијалог и позитивна размена на идеи за нови односи и политики на промени.
Во исто време, тие се загрижени поради, како што се наведува, постојаните обиди на екстремните националисти во двете земји да го нападнат овој процес. Особено загрижувачки е нивниот пристап до јавните бугарски и македонски медиуми во кои постојано сеат меѓусебна недоверба и омраза, настојувајќи да ги поткопаат новите напори за промена кои се во зародиш. Авторите на писмото зад ваквите постапки ги гледаат пипалата на поранешните агенти на Државната безбедност и УДБА, од кои некои во јавниот простор изложуваат стари и лажни идеолошки пароли, кои звучат примамливо, но се штетни за добрососедските односи.
„Не треба да се дозволи да нѐ поделат гласовите на поранешните агенти на Државната безбедност и УБА, научници и јавни личности кои соработувале со тоталитарните режими кои дејствуваат против интересите на двете земји. Ваквите луѓе инволвирани во наметнување на спротивставување и поделеност во политиката не треба да бидат дел од институционалниот и социјалниот дијалог меѓу двете држави и двата народа“, пишува во писмото.
