Тој посочи дека тоа се вкупно околу 50 држави, меѓу кои САД, Велика Британија, членките на ЕУ, Канада, а од регионот од земјите кои не се членки на Унијата ги наведе Црна Гора, Албанија и Македонија.
„До сега вклучувањето во овој список значи дека руските граѓани и компании, самата држава и нејзините региони можат да ги исплатат во руски рубљи заемите добиени од соодветните земји. Русија се уште не ги разработи сите мерки што ќе ги примени како одговор на западните санкции. Нашата одлука е реакција на отворено непријателските постапки на владите на овие земји,“ рече амбасадорот Баздникин.
Тој посочи дека досега врз Русија се спроведени 5.530 рестриктивни мерки од санкциите и изрази жалење што кон нив се приклучила и македонската Влада.
Баздникин изјави дека до Амбасадата стигнуваат многу барања од македонски компании, кои можат да бидат погодени од реципрочните мерки, да се изземат од тие мерки, но за жал, вели, „не може да не реагираме во таква ситуација”.
Прашањето, нагласи тој, се разгледува сеопфатно во однос на секоја земја.
Рускиот амбасадор тврди дека уште на почетокот на воената операција барале средба со МНР, но, како што посочи се до 7 март не добиле никакви информации.
„На почетокот на специјалната воена операција за заштита на Доњецк и Луганск ние постојано баравме средба со МНР за да пренесеме важни информации во врска со тоа што се случува во Украина. И покрај овие наши барања до 7 март немавме средби со претставници на МНР,“ изјави амбасадорот.
Тој додаде дека е подготвен да се сретне со челниците на земјата во секое време и да објасни за се околу ситуацијата во Украина.
Според него против Русија се води информативна војна, во која, како што рече, се користат сите расположиви средства за да се дискредитира раководството на земјата.
