„Не е загрозена безбедноста на премиерот. Истрагата е во тек. За првпат во историјата на државата, уапсен е човек од обезбедувањето на премиерот поради сомневање за сторено кривично дело“, изјави Митева.
Доцна попладнево МВР соопшти дека вчера по претходно добиени сознанија за сторено кривично дело оддавање службена тајна, од страна на полициски службеници од Одделот за внатрешна контрола, криминалистички истраги и професионални стандарди во координација со ОЈО ГОКК била спроведена координирана полициска акција и биле извршени претреси на дом, возила и луѓе од Велес.
„При спроведувањето на полициската акција и преземените мерки и активности, на паркинг просторот пред хотел во Велес, во возило бмв затекнати се А.С., полициски службеник во oдделот за заштита на определени личности и објекти и Б.К., а при извршен претрес во возилото пронајден е ранец со службени материјали од МВР и од лицата се одземени мобилни телефони, по што се лишени од слобода. Од преземените мерки и активности во процесот на проверка, ОВККИПС констатира дека полицискиот службеник постапувал спротивно на законските и подзаконските акти на Министерството за внатрешни работи, со што истиот неовластено поседувал службени материјали, нивно откривање на трети лица надвор од министерството, а со кои дејствија го извршил кривичното дело по член 360 од Кривичниот законик. Од страна на ОВККИПС до ОЈО ГОКК на денеска ќе биде поднесена кривична пријава против А. С., за кривично дело оддавање службена тајна“, соопшти доцна попладнево МВР.
