Овој закон претставува стратешки чекор напред, со кој обновливите извори на енергија за првпат се уредуваат во посебен закон (Lex specialis), одвоен од останатите енергетски закони – по примерот на голем број земји од регионот и ЕУ. Причината е јасна: обновливите извори на енергија (ОИЕ) претставуваат сложена, но сè поважна и динамична област, со огромно влијание врз економијата, екологијата и енергетската независност, соопшти Министерството за енергетика.
Овој посебен закон е подготвен согласно Владината програма за 2025 година и со цел да обезбеди јасна и комплексна регулатива која ќе ги уреди сите аспекти поврзани со обновливите извори на енергија (ОИЕ) — од поставување цели и мерки за поддршка, до конкретни механизми за финансиска стабилност и заштита на потрошувачите.Законот е целосно усогласен со последните промени во европското енергетско право, пред сè со RED III Директивата, која ја регулира промоцијата и користењето на обновливите извори и е обврска за земјите-членки на Енергетската заедница.
Во нацрт-законот јасно се дефинирани национални цели за зголемување на уделот на ОИЕ во бруто потрошувачката на енергија. Се воведува нов финансиски механизам – „Договор за пазарно порамнување на разликата“ (Two-way contract for difference), кој гарантира стабилност и предвидливост на приходите за производителите на енергија од обновливи извори, а истовремено ги штити потрошувачите од екстремни ценовни флуктуации. Се регулира нето-мерењето (Net metering) и нето-пресметката (Net billing), кои овозможуваат поефикасно користење и пласирање на произведената електрична енергија од домаќинствата и бизнисите.
Со новиот закон, Министерството го поставува користењето на обновливи извори во срцето на националната енергетска политика, поврзувајќи економски развој, екологија, социјална правда и европска интеграција.
Меѓу најзначајните новини во законот е воведувањето на нов финансиски механизам на европско ниво – т.н. двонасочен договор за пазарно порамнување на разликата во цена (two-way contract for difference).
Со нацрт-законот првпат се регулираат и методите за управување со вишокот на произведена енергија: Net metering – вишокот произведена енергија се пренесува како енергетски депозит за следниот период; Net billing – вишокот се пресметува во парична вредност и се користи за намалување на сметките во следните периоди.
