За разлика од досегашниот пристап заснован на донации, новиот модел воведува „одговорно сопствеништво“, каде децата на возраст од 10 до 17 години преку труд и стекнување знаења го заработуваат правото на сопственост на својата компјутерска опрема. Компјутерите не се подарок, туку прва „професионална плата“ за успешно завршена обука.
Клучен елемент во програмата е „Пасошот на вештини Марјановиќ“ – документ што го следи напредокот на секое дете. Секој завршен модул носи „виза“ во пасошот, а целосно пополнетиот пасош значи дека детето ја стекнало трајната сопственост на компјутерот и конкретни применливи вештини.
„Сакаме децата да знаат дека се способни, вредни и дека со сопствен труд можат да постигнат сè. Нашата цел е тие да излезат од институционалната грижа со знаење, самодоверба и пасош на вештини што ќе им помогне при вработување“, изјави Александар Марјановиќ, основач и извршен директор на Фондацијата.
Директорката на Детскиот дом „11 Октомври“, Павлина Трајановска, истакна дека програмата има значајно влијание врз емоционалната стабилност и мотивацијата на децата, нагласувајќи дека чувството дека нешто им припаѓа затоа што го заслужиле е од непроценливо значење за нивната иднина.
Едукацијата ќе ја спроведува академијата Еверест преку пет образовни столба: основи на Windows и безбедно користење интернет, Microsoft Office, англиски јазик, креативни дигитални вештини и кариерна обука. Наставата ќе се реализира хибридно – преку менторски средби, онлајн часови и дигитална библиотека со материјали.
Проектот се реализира со поддршка на бројни партнери, меѓу кои Datalab, Сетек, КАБТЕЛ, ФИНКИ, МАСИТ и МАЧР, како и неколку домашни и странски донатори. Идејата произлегува од личната животна приказна на професорот Ѓорѓи Марјановиќ, со цел децата без родители да добијат вистинска шанса за квалитетно образование и достоинствен живот во Македонија.
