Директорот на Управата за извршување на санкции, Александар Пандов, посочи дека пробацијата во Македонија постои веќе шест години, но не се користи доволно.
„ Таа мерка живее, меѓутоа има многу поголем капацитет и многу почесто и подолги треба да бидат тие условни отпусти. Бројките покажуваат дека низ македонските судови има 430 осудени лица со А третман и 330-40 со Б2 третман. Не велам дека сите, но, најголем дел од тие осудени лица можат да бидат на условен отпуст, нормално, претходно со препорака од секторот за ресоцијализација во затворите и од директорите на македонските затвори, рече Пандов во изјава за медиуми пред настанот.
Тој го нагласи и економскиот аспект на проблемот.
„Еден осуденик, месечно не чини околу 1.000 евра. Тврдам одговорно дека не мал број од овие 750 луѓе не чинат нас како општество, одат таму како во хотел се однесуваат, ги храниме, ги чуваме. Земаат човечки ресурси, дали луѓето од ресоцијализација се ангажирани, дали затворската полиција“, рече тој.
Директорот Пандов посочи дека соработката со невладини организации е активна, а пробациските мерки се следат според видот на делото – од домашно насилство до злоупотреба на наркотични средства. Тој информираше дека има над 100 барања за прекин на пробацијата кои најчесто се поради непочитување на препораките од страна на осудениците.
Претседателот на Судскиот совет, Александар Камбовски, ја истакна важноста на ресоцијализацијата.
„Со овој чекор правиме една позитивна работа во промовирање на условниот отпуст и пробацијата која што е подолг период во нашата држава согласно законските прописи. Целта на казнувањето не е секогаш казната сама по себе, туку и ресоцијализацијата и рехабилитацијата на сторителите на кривични дела, а секако, условниот отпуст игра доста важна улога во таа насока“, рече тој.
Директорката на Академијата за судии и јавни обвинители, Трајкоска Стрезоски ја нагласи улогата на Академијата.
„Ние како академија сме тука присутни да им дадеме поддршка на судовите и судиите кои што ги работат овие алтернативни мерки и санкции, секако и во процесот на едукација“, рече таа.
На настанот присуствуваа претседатели на кривични оддели од апелационите судови, претседатели на основни судови и судии кои работат на условен отпуст.
Пробациската служба е воспоставена со Законот за пробација (Службен весник на РМ 226/15) од 2015 година. Пробацијата е стручна служба организирана на ниво на Сектор во Управата за извршување на санкции (УИС), при Министерството за правда. Спроведува надзор над извршување на казните без лишување од слобода, поточно над алтернативните мерки: условна осуда со заштитен надзор, општокорисна работа и куќен затвор, како и над извршувањето на условниот отпуст, изречени со одлука на судовите.
Пробациската служба врши надзор на осудените лица и им нуди поддршка, а целта е да се одржи безбедноста во заедницата со подобрување на ресоцијализацијата и рехабилитацијата на лицата над кои се извршуваат пробациски работи, како и да се намали затворската популација.
