Ова следи откако пратеникот Љупчо Пренџов како член на собраниската Комисија за надзор на АНБ и АР јавно го повика претседателот на Комисијата Скендер Реџепи од Eвропскиот фронт да закаже итна седница, по што тој рече дека додека е претседател и дискриминиран нема да свика таков состанок.
„Целта е на седницата да се разгледаат загрижувачките сомнежи за незаконско постапување во АНБ, односно, да утврдиме точен датум за официјална посета во Агенцијата за национална безбедност преку која ќе извршиме директен увид во состојбите и темелно испитување на сите околности поврзани со овие настани“, изјави Пренџов.
И покрај ова, претседателот на комисијата Скендер Реџепи Зејд одби да ја закаже седницата затоа што тој сѐ уште нема добиено безбедносен сртификат за пристап до класифицирани информации.
„Која би била логиката, председателот на комисијата да не може да присуствува на еден таков состанок или таков претрес во службите. Пред една година имам поднесено барање за безбедносен сертификат. Сметам дека тоа е дискриминација“, изјави Реџепи.
Поради ова, седницата ја свика претседателот на Собранието, Африм Гаши, а со неа требаше да претседава пратеничката од СДСМ, Славјанка Петровска.
