Денешната реакција на градоначалникот на Демир Хисар, Најдовски доаѓа по објавата на текстот: Едикојси против Петрета Андреевски или „Еј бре кој си ти против Петрета да бидиш?!“ од страна на писателот и професор по книжевност на Филолошкиот факултет „Блаже Конески“ – Скопје, Венко Андоновски, во која го повикува министерот за култура и туризам итно да преземе мерки за постановката на Петре М. Андреевски да стане државна сопственост и да се стави под целосна државна заштита.
„Пишувале синот и пријателите на Петрета писмо до господата локални и глобални политички моќници – ама наишле на тотален бојкот! Па зар до тоа дојдовме – семејствата да се грижат за столбовите на македонската култура, а не државата?! Јасно е ќе пропадне тоа од едикојси наместен локален полтрон на некои политички избори. Или, како што напишав во една колумна за претходните (а и овие сега не влечат поука) – кои сте бре вие?! Ќе пострада Петре од едикојси, или, да се огласам со револт – еј, кои сте бре вие рака на Петрета да кревате?! Кои се тие политички бирократи и паланечки анонимуси кои не си ја ценат светската вредност што ја имаат во дворот?! Тоа е паланечко однесување опишано во многу книги! И јасно ми е зошто Македонија никогаш до 1945 година немала држава, а од 1945 ја имала само формално, зашто политичарите, леви, десни или средни, се однесуваат како да не сакаат држава! Како да не сакаат да постои Македонија! Додека сами не се цениме, нема никој да нè цени“, напиша на фејсбук Андоновски.
Токму ова беше причина за острата реакција на градоначалникот на Демир Хисар, Никола Најдовски. Тој на неговата страница на фејсбук објави дека меморијалната поставка на Петре М. Андреевски во село Слоештица се наоѓа во одлична состојба и објектот и експонатите се редовно одржувани. Тој објаснува дека објектот е во сопственост на Општината, а неговото управување е доверено на невладина организација избрана на јавен повик, спроведен и усвоен од страна на Советот на Општината, согласно сите законски и демократски процедури. Според Најдовски, Андоновски шири неточни информации и манипулативни тврдења. Тој објави и фотографии од објектот и од меморијалната поставка, но не навел кога се направени овие фотографии.
„Во текот на последните четири години, Општина Демир Хисар спроведе повеќе конкретни активности за афирмација на ликот и делото на Петре М. Андреевски, меѓу кои, преименување на градската библиотека со неговото име, изработка на впечатливи мурали на Домот на културата посветени на неговото дело, поддршка на културни настани и проекти што ја слават неговата книжевна оставнина. Сите овие активности се резултат на институционална грижа и се реализирани во овој мандат, во духот на почит кон националното културно наследство. Посебно ја осудуваме практиката на јавни личности да шират непроверени и невистинити информации преку социјалните мрежи, без ниту обид за контакт или консултација со надлежните институции. Таквиот пристап не придонесува кон заштита на културните вредности, туку напротив – создава лажна слика и недоверба во институциите кои секојдневно вложуваат труд и средства во таа насока. Јавната комуникација преку социјални мрежи, особено кога се заснова на дезинформации и претпоставки, е недозволив начин на однос кон сериозни теми како што е културното наследство. Општина Демир Хисар ги охрабрува сите граѓани, културни дејци и јавни личности да соработуваат институционално и одговорно, а не преку сензационализам и злоупотреба на медиумскиот простор“, напиша на фејсбук градоначалникот Најдовски.
Министерот за култура и туризам Зоран Љутков најави дека на 18 август ќе ја посети меморијалната поставка посветена на великанот на македонската книжевност Петре М. Андреевски, во неговото родно село Слоештица, демирхисарско.
Во објава на социјалните мрежи, денеска, министерот за култура и туризам, Љутков, порача дека таму не оди само како поединец, туку „како глас на сите оние што не се согласуваат културното наследство да се заборава, запоставува и распаѓа“.
„Сакам со свои очи да видам во каква состојба се наоѓа просторот што треба да биде светилиште на македонскиот дух и збор. Иако оваа поставка формално не е под ингеренции на Министерството за култура, како министер чувствувам одговорност да реагирам и да делувам – затоа што кога станува збор за великан како Петре М. Андреевски, културната должност е над административните граници“, вели Љутков.
Досега, додава, до него како министер за култура не е пристигнато никакво официјално обраќање или известување во врска со условите во кои се наоѓа поставката.
„Оваа информација за првпат ја добив преку социјалните мрежи. Тоа зборува за погрешна комуникациска практика која мора да се надмине – институциите постојат токму за ваквите прашања. Истовремено, ја информирам јавноста дека Министерството за култура презема обврска да обезбеди траен, соодветен и институционално признат простор за презентација на ликот и делото на Петре М. Андреевски во рамки на Националната и универзитетска библиотека Св. Климент Охридски во Скопје“, наведува Љутков.
Просторот, вели, ќе овозможи достоинствена поставка на ракописи, лични предмети и архивски материјали на Андреевски, како и пристапност за истражувачи, студенти и граѓани, што, според Љутков, претставува институционална грижа и заштита на неговото културно наследство.
„Верувам дека ова не е само чин на оддавање почит, туку и исправување на долгот кој македонската култура го има кон еден од своите највеличествени творци. Петре М. Андреевски не е само писател. Тој е дел од духовниот темел на нашата држава. Неговото дело мора да биде зачувано таму каде што му е местото, во срцето на нашата културна меморија“, пишува во објавата.
