На конференцијата присуствуваа 50 делегати од Бугарија, како и шест гости. Конференцијата ја отвори Иван Сингартијски, а започна со партиската химна „Народе Македонец“ и едноминутно молчење за македонските дејци што го напуштиле овој свет.
Димитар Иванов одржа рецитал, како и поздравни честитки за Кирил Тилев – претседател на ОМО Илинден, и Аце Димовски од Светскиот македонски конгрес. Честитки до конгресот упатија Европската слободна алијанса, Македонската алијанса за европска интеграција (Албанија), Меѓународното македонско движење за човекови права (Канада) и Пиринското друштво од Австралија – Мелбурн.
Конференцијата ги прифати извештаите на Централниот ревизорски комитет и на претседателството на партијата, а потоа беа избрани претседателството, централниот совет и КПС. Иван Сингартијски, Ангел Безев, Стоико Стоиков, Христо Џупанов и Дамијан Ризаков беа избрани за копретседатели. Од споменатата конференција произлезе и Декларацијата единаесеттата национална конференција на ОМО Илинден–Пирин.
Во Декларацијата се осудува политиката на Бугарија за негирање на македонската нација, идентитет, јазик и историја, за асимилирање и дискриминација на македонското малцинство во Бугарија.
„Ја осудуваме политиката на Бугарија против македонското малцинство во Албанија, каде што со делење државјанство и уцени се обидува да создаде вештачко бугарско малцинство.
Ја осудуваме политиката на Бугарија за блокирање на членството на Македонија во ЕУ. Ја осудуваме политиката на Бугарија за поттикнување провокации во Македонија, кои потоа се претставуваат како ‘дискриминација’ против Бугарите таму и се користат како изговор за блокирање на членството на Македонија во ЕУ. Ваквите провокации ја продлабочуваат омразата меѓу двата народа.
Го осудуваме говорот на омраза во Бугарија насочен против македонското малцинство, македонската нација и македонската држава.
Ја осудуваме пасивноста на Европската Унија, која дозволува политиката на асимилација и дискриминација против Македонците во Бугарија, наследена од тоталитарниот комунизам, да продолжи во нејзините граници.
Го осудуваме фактот што ЕУ дозволи и дозволува Бугарија да наметнува антицивилизациски барања врз кандидат за членка, да дозволи позицијата на земја членка да се користи за уцена и да наметнува нелегални барања.
Ја поздравуваме политиката на македонската влада во заштитата на македонскиот национален идентитет, јазик, историја и македонското малцинство во Бугарија.
Ја поздравуваме борбата на ЕФА во одбрана на правата на угнетените народи во Европа, во одбрана на македонските малцинства во Бугарија и Грција и во одбрана на Република Македонија.
Овие барања ја понижуваат Бугарија и сериозно ги влошуваат односите со Македонија, меѓу два народа што треба да бидат пријатели и добри соседи.
Фактот дека ние, европските граѓани, сме дискриминирани во Европската Унија од страна на европска држава е срам за ЕУ.
Македонското малцинство и нација се тука и нема да исчезнат поради нечии болни соништа.
Нема да престанеме со нашата борба за права и заштита на нашиот идентитет.
Ja повикуваме Европската Унија да го укине правото на консензус и вето злоупотребено од земји како Бугарија; да ги започне процедурите за прием на Македонија, игнорирајќи ги бугарските барања; да преземе мерки Бугарија да почне да ги почитува и спроведува малцинските права кон Македонците и сите други малцинства во Бугарија; да гласа за вклучување на македонскиот идентитет во Извештајот на ЕУ за напредокот на Македонија.
Република Бугарија треба да ја прекине својата антимакедонска политика; да ја деблокира европската интеграција на Македонија; да го запре негирањето на македонското малцинство на нејзина територија и да му ги даде сите права загарантирани со меѓународни договори.
Република Македонија треба да продолжи да се бори за правата на сите Македонци“, се вели во Декларацијата на националната конференција на ОМО Илинден-Пирин.
