„Цените на лековите претставуваат клучен инструмент за обезбедување достапна терапија за граѓаните и одржливост на здравствениот систем, поради што нивното утврдување е стратешка одлука со директно влијание врз јавните здравствени расходи“, појаснува министерот за здравство Азир Алиу во писмена изјава.
Врз основа на анализите и преговорите, утврдени биле намалувања на максималните цени кај лековите каде што постојат соодветни пазарни показатели.
„На веб-страницата на министерството се објавени одлуките со новите намалени максимални цени, при што намалување е постигнато кај 156 оригинаторни лека, 174 генерички лека и 13 од интервентен увоз“, се додава во соопштението.
Како што е најавено, новите цени ќе почнат да се применуваат од 1 мај годинава по периодот во кој фармацевтските компании ќе ги усогласат цените во прометот на големо и мало.
„Особено го издвојуваме намалувањето на цената на лекот „ксарелто“ („ривароксабан“), кој се користи во третман на кардиоваскуларни заболувања. Кај овој лек е постигнато значително намалување на цената во прометот на големо: за таблетите од 15 и 20 милиграми – од 2.307,48 денари на 1.606,10 денари, за таблетите од 10 милиграми – од 824,10 денари на 589,45 денари“, се додава во соопштението.
Според министерот Алиу, со оваа мерка се овозможува поголема достапност на терапијата за пациентите, особено имајќи предвид дека станува збор за лек што често се набавувал од странство, поради пониски цени.
Министерството за здравство информира дека овој лек е приоритет за вклучување на позитивната листа за примарна здравствена заштита во текот на 2026 година.
„Предлогот е веќе доставен до Управниот одбор на Фондот за здравствено осигурување, со што се очекува дополнително олеснување на трошоците за пациентите преку утврден надомест од државата, а пациентите ќе имаат право на избор на лек од друг производител. Министерството за здравство останува посветено на креирање политики што обезбедуваат квалитетна, достапна и одржлива здравствена заштита за сите граѓани“, се нагласува во соопштението.
