Видео снимките по социјалните мрежи се објавени денеска, а инцидентот се случил на 22 март. Граѓанин пријавил дека возило „порше каен“ непрописно било паркирано на улицата „Орце Николов“ во Скопје. Пред возилото се собрала група граѓани кои барале возилото да биде отстрането од велосипедската патека. Откако дошле од пајак службата, две лица излегле од кафеаната, се претставиле дека се службени лица, и го информирале колегата од пајак службата дека возилото било службено. Полицаецот влегол во пајак возилото и откако проверил дека „поршето“ не е службено потпишал налог да се отстрани.
МВР соопшти дека сторител на прекршокот е С.К. (76) од Скопје, а сопственик на возилото е М.Т. (48) од Скопје.
„Двете лица кои се претставиле како полициски службеници и тврделе дека возилото е службено, со патничко возило ‘форд мондео’ се упатиле кон депото каде што било однесено ‘поршето’. Возилото ‘форд мондео’ било управувано од полициските службеници Т.Д. и И.С., распоредени во Одделението за лично обезбедување на претседателот на РМ. Со овие полициски службеници е извршен службен разговор, при што е констатирано дека сториле потешко прекршување на работниот ред и дисциплина. Од страна на ОВККИПС до Одделот за дисциплински и судски постапки ќе биде поднесен предлог за утврдување на дисциплинска одговорност“, соопшти МВР.
