Во честитката до православните христијани, премиерот Мицкоски порача дека Божиќ е празник кој нè потсетува на суштинските вредности што го обликувале карактерот на народот – семејството, верата, солидарноста и меѓусебната почит. Тој истакна дека силата на општеството започнува во домот, а стабилната држава се гради врз здрави семејства и грижа за најмладите.
„Во време на брзи промени и многу предизвици, овој празник нè повикува да застанеме, да размислиме и да се вратиме кон вредностите што нè одржале: солидарноста, заемната грижа и одговорноста кон ближниот“, наведува Мицкоски, потенцирајќи дека грижата за семејствата и децата е директна грижа за иднината на државата.
Премиерот порача дека Божиќ е и потсетник за важноста на единството и заедништвото, додавајќи дека само како заедница што се почитува и си помага, може да се градат стабилна, праведна и сигурна држава. Тој на сите православни христијани им посака мир во домовите, здравје и спокој во семејствата.
Мицкоски денеска присуствуваше и на Божикната литургија во Соборниот храм, од каде упати кратка празнична порака: „Христос се роди, навистина се роди. На сите граѓани им посакувам пред сè здравје, среќа и мир во домот“.
Одговарајќи на новинарско прашање, тој изјави дека паричката за Бадник му се паднала нему.
Честитка по повод Божиќ упати и претседателот на СДСМ, Венко Филипче, кој по свечената божествена литургија во Соборниот храм „Св. Климент Охридски“ во Скопје, на верниците им посака мирни и весели празници.
„Го честитам најрадосниот празник во христијанството со традиционалната честитка Мир Божји и Христос се роди. Ова е повод семејствата да се соберат, да се покаже почит и грижа, а мирот во овие турбулентни времиња ни е неопходен за да продолжиме да градиме праведно, толерантно и слободно општество“, изјави Филипче.
Тој порача дека општеството треба да се гради така што никој нема да биде дискриминиран и потсети на политиките што, како што рече, во минатото биле насочени кон подобар, побезбеден и поквалитетен живот за граѓаните, без разлика на етничка, национална, верска, културна, полова или сексуална припадност.
Филипче откри дека паричката за Бадник во неговото семејство се паднала кај неговиот син.
