На 30 октомври оштетениот, заедно со една од осомничените жени, отишол во мотел во Скопје, по што таа му предложила да повика уште една девојка. Оштетениот се согласил, па осомничената ја повикала другата жена, по што двете заедно го убедиле оштетениот да одат во „поубав и поевтин хотел“.
Излегувајќи од собата, во темниот двор на мотелот ги пресретнале двајцата мажи, кои биле во договор со жените, и заедно се нафрлиле на оштетениот. Го удирале со боксови по главата и телото додека не паднал на земја, а од џебовите му ги одзеле парите, мобилниот телефон и личната карта.
Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за сите четворица осомничени, поради опасност од бегство и можност да го повторат делото.
За една од осомничените жени, која е во бегство откако го извршила делото, притворот ќе започне да се применува од нејзиното пронаоѓање и лишување од слобода.
