Македонската делегација на јубилејниот десетти форум на Крит ја предводи министерот за европски прашања Орхан Муртезани.
Од Министерствата за национална економија и финансии и за надворешни работи на Грција преку заедничко соопштение информираа дека во рамките на годишниот форум на Крит ќе се одржи „Министерски состанок на Иницијативата/ЕУСАИР (на 6 мај), со усвојување на Критската декларација; Панелот на министри надлежни за европските програми; церемонијата на предавање на претседателството од Грција на Македонија, како и прес-конференција на шефовите на двете претседателства“.
Паралелно, додадоа дека форумот вклучува богата програма на сесии и тематски настани со учество на над 400 претставници од земјите-членки на Стратегијата, од Европската комисија, академската заедница, граѓанското општество и бизнис светот.
„Целта на грчкото претседателство и Форумот е зајакнување на регионалната соработка во Јадранско-јонскиот макрорегион, промоција на европската перспектива на Западен Балкан, истакнување на улогата на социјалната кохезија, истакнување на сините вештини и справување со климатските промени во новиот ревидиран Акциски план, како и да се поврзе ЕУСАИР со идната Кохезиска политика по 2027 година“, соопштија од Министерствата за национална економија и финансии и за надворешни работи на Грција.
Додадоа дека со десеттиот годишен форум на Крит ќе се истакне „стратешката улога на Грција како мост меѓу Европската Унија и Западен Балкан и ќе се потврди и цврстата посветеност на земјата кон зајакнување на европската кохезија, транснационалната соработка и одржливиот развој во поширокиот регион“.
Министерот за европски прашања Орхан Муртезани ќе ја предводи делегацијата на Република Македонија на Форумот на ЕУ Стратегијата за Јадранско-јонскиот регион (ЕУСАИР), кој во рамки на грчкото претседавање, од денеска до 7 мај 2025 година ќе се одржи на Крит, Грција.
Како што соопштија денеска од Министерството за европски прашања, Македонија официјално ќе го преземе претседавањето со Јадранско-јонската иницијатива од Грција, првпат откако земјата стана дел од овие формати за регионална соработка.
Покрај церемонијата на примопредавање, министерот Муртезани, како што е најавено, ќе учествува и на Панелот на министри за фондови на ЕУ и на министерскиот состанок, како дел од пошироката агенда на Форумот посветена на зајакнување на регионалната соработка, поврзаност и интеграција во Јадранско-јонскиот регион.
Претседателството на Македонија со ЕУСАИР и Јадранско-јонската иницијатива започнува на 1 јуни 2025 година и ќе трае една година.
