Досега, целосно е асфалтиран потегот од граничниот премин на Албанија до Пештани во должина од 19 километри, a согласно договорениот рок, се очекува патот да биде целосно завршен до крајот на јуни пред почетокот на летната сезона.
Од Министерството информираат дека заради зголемување на безбедноста во сообраќајот како и прегледност на патот, извршено е растеретување на косините од нестабилен карпест материјал, завршено е со монтажа на заштитна челична мрежа на косините, а исто така на дел на патот поставена е заштитна ограда.
Останува да се доасфалтираат околу пет километри, од излезот на Пештани до хотелот Метропол и да се постави заштитна ограда и хоризонтална и вертикална сигнализација.
„Со рехабилитација на оваа главна туристичка сообраќајна делница, ја подигнуваме безбедноста во сообраќајот и обезбедуваме квалитетна патна врска од Охрид до манастирскиот комплекс Св. Наум. Исто така, овој магистрален пат има регионално значење бидејќи претставува патна врска со Република Албанија“, вели министерот за транспорт Александар Николоски.
Со реализација на овој проект, покрај подобрување на патната мрежа во охридскиот регион, како што нагласува ресорното министерство, се подигнува квалитетот на туристичкиот потенцијал и економскиот развој на Охрид.
