„До крајот на оваа недела ќе биде распишана јавна набавка, процесот трае севкупно 60 дена и потоа почнуваме со изградба на Универзална сала. Се надевам дека до крајот на септември ќе можеме да ги отвориме понудите и да почнеме со процесот на реконструкција. Во динамиката што ја имаме определено во буџетот, би требало да заврши до крајот на 2027 година. Одвоени се околу 20 милиони евра, распределени во три години“, информираше Љутков.
Со тој план објектот ќе биде отворен за настаните што ќе се одржуваат во рамки на манифестацијата „Скопје – Европска престолнина на културата 2028“.
На средба со новинарите Љутков кажа дека на седница на Влада ќе се одлучи за поддршката – во пари и со простор и ресурси од Министерството за култура и туризам во овој проект што го води Град Скопје и за кој е обврзан да инвестира 25 милиони евра.
Од своја страна, кажа Љутков, министерството веќе помага со изградба на седум мултифункционални објекти низ главниот град што ќе овозможат просторни услови за настаните во 2028 година. Нагласи дека нивната изградба не е предвидена во програмата за проектот „Скопје 2028“ за кој Министерството е поддржувач, а Градот го води целиот процес.
Љутков уште кажа дека затоа што им е важно Скопје да не ја загуби добиената титула од Европската комисија, „притискале“, во Град Скопје да се формира координативното тело за проектот кое досега имало неколку состаноци.
„Ние доцниме две години, уште од старт динамиката не е добра. До јануари овој процес беше блокиран, искомуницирав со градоначалничката и го формиравме координативното тело, притискав постојано да побрзаме да се формира за да не ја загубиме титулата, иако тоа не е моја надлежност. Телото има 13 члена, 10 учествуваат од Град Скопје и тројца на предлог на Министерството за култура. Имаат неколку координативни состаноци, но не сме ние водичи на овој проект туку Град Скопје и затоа не би сакал да излегувам со информации за кои немам надлежност. Град Скопје треба да даде повеќе информации“, рече министерот.
На средбата со новинарите Љутков додаде дека Град Скопје треба да даде 25 милиони евра, на кои се обврзал, но нема потпишан документ за сума што би требало да ја вложи и Министерството за култура во проектот.
Рече дека претходната министерка ветила дека ќе даде 120 милиони евра, и тоа било договорено во тогашната влада, но документот немал официјален потпис. Заедно со 25-те милиони евра од Градот, било ветено дека во манифестацијата ќе бидат вложени 145 милиони евра.
„Дури и Европската комисија во забелешка одговорила дека е невозможно да се обезбедат толку пари и дека никој толку не инвестирал во проектот Европска престолнина на културата“, рече Љутков.
