Од Левица потсетуваат дека поминале девет месеци од трагедијата во која загинаа млади лица, а Собранието во целиот овој период не презело ниту една суштинска мерка. Партиијата обвинува дека највисокиот законодавен дом се однесувал „без слух за јавноста, со очигледна желба случајот да се заташка и заборави“, поради што, како што наведуваат, не смее да продолжи со „истата неодговорност“.
Според Левица, одржувањето на седницата зависи од присуството на пратениците од владејачкото мнозинство, членови или заменици-членови на Комисијата: Александар Велјановски, Миле Лефков, Ангелинка Петкова, Петар Ристески, Бране Петрушевски, Рашела Мизрахи, Игор Здравковски, Фериде Хаџиу и Весна Бендевска.
„Секој од нив има должност да се појави и да овозможи Собранието да ја изврши својата надзорна улога. Нема повеќе алиби, технички причини и други изговори“, порачуваат од партијата, додавајќи дека прашањето е директно поврзано со довербата на јавноста и со „елементарното човечко достоинство“.
Левица оценува дека мнозинството денес треба да го оправда мандатот и да присуствува на седницата, а доколку повторно има опструкции, тоа – како што велат – ќе биде доказ дека ВМРО-ДПМНЕ е подготвено „вистината да ја турне под тепих“.
Според соопштението, секое ново избегнување на седницата ќе покажело дека партијата „ја става сопствената удобност пред болката и гласот на родителите и народот кои бараат правда“.
