„Лицето издржувало мерка задолжително психијатриско лекување, а при бегството се упатил во Центарот за социјални работи во Прилеп каде што пукал со пиштол кон вработена во Центарот, а имало и расправија со директорот на Центарот. Против сторителот биле водени соодветни кривични постапки, но и покрај сите информации за него, сепак лицето успеало да избега, што е сериозен индикатор за аномалиите во работењето на оваа установа. Се поставува прашањето, како бегалецот успеал неколку дена да биде надвор од болницата?! Политичката партија Левица бара итно разрешување на Жан Лозановски, директорот на ЈЗУ Психијатриска болница во Демир Хисар, како кадар на коалицискиот парнер – ЗНАМ. Поради крајно лошо менаџирање со болницата, таа со години наназад, но и денес се наоѓа во очајна состојба“, соопшти Левица.
Партијата дополнува дека претходно, и вработените во болницата алармирале за лошото менаџирање по доаѓањето на директорот Жан Лозановски.
„Ниту една машина за перење не е во функционална состојба и вработените се принудени да позајмуваат алишта за пациентите од Црвениот крст. Дополнително, вработените кои работат со години со договори на определено време, секоја година се во неизвесност дали ќе им биде продолжен договорот. После ваквиот скандал со бегство на пациент, при што беше загрозена безбедноста и на други лица, потребно е министерот Таравари веднаш да го разреши директорот Лозановски и да се утврди одговорност за сериозниот пропуст поради кој дојде до загрозување на животот на едно лице“, велат од Левица.
Но, од Психијатриската болница – Демир Хисар попладнево информира дека навремено се известени надлежните институции, вклучувајќи го и Центарот за социјални работи (ЦСР) Прилеп дека пациентот избегал и за тоа дека се во постојана комуникација со Министерството за внатрешни работи (МВР) во врска со, како што го нарекуваат, немилиот настан што вчера се случи вчера во Прилеп.
Од болницата посочуваат дека во оваа фаза од истрагата заради сензитивноста на постапката нема да изнесуваат дополнителни информации.
СВР Битола информираше дека на 21 март во 20:30 часот во ОВР Демир Хисар, од Јавната здравствена установа – Психијатриска болница Демир Хисар било пријавено дека од болницата избегал пациент на возраст од 50 години. Полициски службеници од ОВР Демир Хисар извршија проверки во Психијатриската болница Демир Хисар и на разговор биле повикани повеќе лица. Исто така, се вршат проверки за тоа како пациентот успеал да избега при транспортот од психијатриската болница и на кој начин дошол до оружјето со кое беше пукано врз жена, социјален работник, вработена во Центарот за социјални работи во Прилеп.
