Кривичниот суд му одреди притвор на Јовановски, се сомничи дека ја поттикнал трагедијата во која починаа сопругата и ќерка му

Основното јавно обвинителство (ОЈО) Скопје до судијата на претходна постапка од Основниот кривичен суд Скопје поднесе предлог за определување мерка краткотраен притвор од 48 часа против скопјанец, за кого постојат сомненија за сторени кривични дела телесна повреда, загрозување на сигурноста и наведување на самоубиство и помагање во самоубиство. Притворската мерка е неопходна со цел преземање на сите истражни дејствија со цел обезбедување докази во однос на сомненијата, соопшти вечерва Јавното обвинителство. Иако осомничениот не е наведен со име и презиме, сепак според описот на кривичните дела за кои е осомничен, станува збор за Стојанче Јовановски, сопруг на Ивана и татко на шестгодишната Катја кои вчера починаа по пад од тераса од семејниот дом во скопската населба Тафталиџе во Карпош.