Нова тема за муабети по Широк сокак во Битола
Битолската полиција поднесе кривични пријави против неколку директори, стечајни управници и книговодители од овој град.
Против Ј.И. (78) од Скопје, генерален директор на „Стопанска банка“ АД-Битола и претседател на кредитниот одбор, и Е.Т. (51) од Битола, управител на „Битола промет малопродажба“, поднесена е кривична пријава за сторено кривично дело злоупотреба на службената положба и овластување, а Е.Т. е пријавена и за посебни случаи на фалсификување исправа и оштетување или повластување доверители.
За лажен стечај се обвинети и Д.Т. (56), управител на „Дијагностички центар“ во с. Кравари, Л.С. (50), сестра на Е.Т., управител на „Интермедикус“ ДООЕЛ Битола, С.Б. (48) од Битола, управител на „Љупчо Бобо компани“ ДООЕЛ Битола, Н.Р. (53) од Битола, книговодител на наведените фирми.
В.Г. (27) од Битола, поранешен управител на „Битола промет малопродажба“ е обвинет за кривично дело „оштетување или повластување доверители“ и В.Т. (63), стечаен управник „Битола промет малопродажба“, за несовесно работење во службата, соопшти МВР.
Сè се случувало пред осум години, кога бил склучен договор помеѓу „Стопанска банка“ АД Битола и фирмата „Битола промет малопродажба“ за одобрување краткорочен кредит во износ од седум милиони денари. Тука почнала класичната приказна помеѓу наброените фирми со невраќање на кредитот, хипотека, блокирање на сметката, анекс-договори, нови заеми, цесии, лажен стечај…
