Според него, проектот од стратешко значење за општина Струмица, од кој денес во пракса сите жители на општината имаат јасни економски, еколошки и сообраќајни бенефити, процедурално е инициран од Општината, изгласан на Советот на Општина Струмица со јасни насоки за формирање јавно сообраќајно претпријатие, спроведување на јавна набавка за автобуси и имплементација на проектот.
„Верувам дека сите овие чекори се спроведени според важечките закони. Истовремено, сакам да потенцирам дека лично јас, а се надевам и сите наведени лица за коишто постои сомневање дека сториле кривично дело, стоиме на располагање на сите надлежни органи и институции, со цел да им биде елаборирано и појаснето на каков начин е спроведен овој проект кој денес беспрекорно функционира во пракса“, напиша Костадинов откако денеска од МВР беше соопштено дека му е поднесена кривична пријава за набавката на електричните автобуси.
На крајот Костадинов додава дека не би сакал да дава политички коментар.
МВР денеска поднесе кривична пријава против поранешниот градоначалник Костадинов и уште пет лица за злоупотреба на постапка за јавна набавка за електрични автобуси.
