Загинатите македонски припадници кои го дадоа животот во антитеротистичката акција постхумно беа одликувани со медал за храброст. Во чест на загинатите во кругот на СВР Куманово беше откриена спомен-плоча, а беше создаден и мурал „Хероите живеат вечно“ во централното подрачје на Куманово.
Да се сеќаваме со достоинство, да работиме на иднина, на мир и заедништво, порача денеска кумановскиот градоначалник, Максим Димитриевски попвот десетгодишнината од трагичниот настан на 9 и 10 мај во кумановско „Диво Насеље“.
„Во чест на десетгодишнината од трагичниот настан на 9 и 10 мај, со длабока почит се сеќаваме на осумтемина припадници на безбедносните сили кои храбро ги положија своите животи. Нивната жртва, постхумно одликувана со медали за храброст, останува вечен симбол на непоколеблива посветеност и несебично служење“, напиша Димитриевски.
Тој посочува дека годишнината носи силна порака достоинствено сеќавање, оддавање заслужена почит но и работа кон иднина ослободена од такви трагедии, иднина на мир, стабилност и заедништво.
„Нека нивниот подвиг биде светилник што нè води кон праведно и безбедно општество. Благодарност до македонските безбедносни сили што се грижат за зачувување на безбедноста и мирот на нашите граѓани“, напиша Димитриевски.
