Во извештајот на инспекторите до министерот за транспорт од 13 март се вели дека урбанистичкиот проект вон опфат на урбанистички план се употребува спротивно на Законот за урбанистичко планирање.
„На барање од Спас за Маврово за вршење вонреден инспекциски надзор за постапките за донесување и изработка на урбанистички проекти вон опфат на урбанистички план согласно член 58 став 6, можна злоупотреба во процесот на нивната изработка и усвојување од кои можат да произлезат издавање одобренија за градење со што се потенцира злоупотребата во работењето на стручните служби во Општина Маврово Ростуше и неопходноста од итноста во постапување на институциите“.
Инспекторите утврдиле дека од Медат Куртовски незаконски биле потпишани урбанистичките проекти за Миас фаворите, Глобал Балкан, Луан Мусаи… Сите овие решенија се однесуваат главно на градби околу Мавровското Езеро, апартмани, хостели, традиционални куќи за потребите на туризмот, згради со апартмани и студија…
„Урбанистичките проекти вон опфат на урбанистички план се изработуваа спротивно на Законот за урбанистичко планирање. Утврдени се неправилности во работата на субјектот на надзор застапуван од градооначалникот Медат Куртовски“. Во извештајот се наведува дека урбанистички проект вон опфат на урбанистички план се изработува за поединечни градби вон населени места и вон опфат на урбанистички планови и тоа на земјоделско, шумско и друго земјиште каде не постојат услови и економска оправданост за изработка на урбанистички план согласно Законот за урбанистичко планирање.
Во изјавите за медиумите Куртовски овие негови предновогодишни активности со потпишувањето на ови одобренија ги толкуваше како право на граѓаните на својата парцела да си поднесат урбанистички проект вон опфат на урбанистички план каде што можат да дојдат до одредено одобрение за градба. „Тоа е исто како да носите нов урбанистички план ама само за својата парцела“, вели Медат Куртовски, градоначалник на Маврово-Ростуше и додава дека службите на Општината увиделе дека тука нема ништо спорно.
Но, инспекторите велат дека урбанистички проект вон опфат на урбанистички планови се изработува вон населени места, а не како што општината и проектантите го толкуваат тоа – вон опфат на урнбанистички план. Урбанистички проект вон опфат на урбанистички план не се изработува за подрачја со историја на планирање во урбанистички план за село.
Плановите на општината се однесуваат на градежно земјиште, на територија на населено место, село и врз основа на планирање на простор издадени за населено место што е спротивно на тоа како Законот за урбанистичко планирање го дефинира урбанистичкиот проект вон опфат на урбанистички план.
Државниот инспекаторат за градежништво и урбанизам укажува дека општината треба да направи измена и дополна или да изработи нов урбанистички план за село со што ќе овозможи развој, заштита на природата, хуманизација и примена на нормативите во урбанистичкото планирање на Општина Маврово и Ростуше.
И овој извештај, како и бројни примери за кои пишувавме во изминатиот петгодишен период, покажа дека Општина Маврово Ростуше за време на мандатите на Медат Куртовски се претвори во институција која воопшто и не се грижеше за заштитата на Мавровското Езеро од бетонизацијата и зачувувањето на атрибутите на еден национален парк. Општинарите ги интересираше само комуналиите, а од примерот со Елезоски и некои други суми кои се давале под рака.
А.Д.
