Целта на проектот, реализиран со поддршка од Сојузот на борците на Македонија, е да се сочува сеќавањето на 66-те народни херои од Македонија и да се пренесе нивното дело на идните генерации преку филателистички материјал со историска и културна вредност.
Проектот започна во 2021 година со издавање на серија од седум спомен-пликови со стилизирани ликови на херои. Изданијата, кои вклучуваат и разгледници, се изработени во ограничен тираж и се проследени со пригоден поштенски печат и јубилејна марка – често со мотиви од родното место на херојот. Автор на уметничките решенија од 2022 година е познатиот македонски дизајнер Зоран Кардула.
Во изминатите четири години беа одржани повеќе промоции на овие изданија во родните места на хероите, а комплетната колекција е изготвена според меѓународни филателистички стандарди и ќе биде претставена во специјална спомен-брошура.
Оваа година, одбележувањето на 80-годишнината од победата над фашизмот се совпадна со 75-годишнината од основањето на Сојузот на филателистите на Македонија. По тој повод, изготвено е и ново јубилејно лого на Сојузот, а Македонската пошта ќе изработи посебен пригоден печат.
Македонските филателисти повеќе од седум децении ја претставуваат државата на балкански, европски и светски изложби, при што се здобиле со бројни награди и признанија, истовремено придонесувајќи за зачувување и промоција на македонското културно и историско наследство.
