Заеднички беше потврдена посветеноста на Владата кон реформската агенда и целосната усогласеност со Заедничката надворешна и безбедносна политика на Унијата, што претставува силна потврда за стратешката ориентација на државата и трасира кредибилен и веродостоен пат кон полноправно членство во ЕУ.
На средбата стана збор и за трагедијата што неодамна се случи во Кочани, при што министерот Муцунски изрази благодарност за поддршката што ЕУ ја покажа – како преку директната помош од земјите членки, така и преку брзото активирање на Европскиот механизам за одговор на кризи.
Во рамки на работната посета на Луксембург, на покана на високата претставничка за надворешна и безбедносна политика на ЕУ и потпретседателка на Европската комисија, Каја Калас, министерот Муцунски синоќа учествуваше на неформалниот состанок на Советот за надворешни работи на ЕУ, во формат на министри за надворешни работи на земјите-членки и земјите од Западен Балкан.
Состанокот продолжува и денеска, а целта е во инклузивен формат, да се дискутира за продлабочување на соработката меѓу ЕУ и Западниот Балкан на полето на европската безбедност.
На состанокот се очекува министерот Муцунски да ја истакне целосната усогласеност на државата со Заедничката надворешна и безбедносна политика на Европската унија – како потврда за стратешката ориентација кон полноправно членство во ЕУ, но и како показател за доследната посветеност на промоцијата и заштитата на европските вредности и принципи.
Во рамки на посетата, министерот Муцунски ќе оствари билатерална средба со вицепремиерот и министер за надворешни работи на Луксембург, Гзавие Бетел, соопшти МНР.
