МВР соопшти дека Рамадани бил уапсен при пасошката контрола откако системот јавил дека лицето се евидентира со мерката „апси“, по што бил предаден на полициски службеници од СВР Тетово.
Србија бара Рамадани да им биде испорачан, а од Косово порачуваат да не се екстрадира во Србија каде што е баран за извршени воени злосторства за време на војната 1999 година.
„Многу често се случува земјите да уапсат некого, а потоа да не го екстрадираат. Ако некој навистина сака да се бори против воените злосторства, ако има документирани обвиненија, тогаш секако очекуваме да биде екстрадиран за да одговара за злосторствата“, изјави денеска Ивица Дачиќ, вицепремиер на Србија.
Наспроти него, претседателот на косовската влада Албин Курти очекува македонските власти да им го врати косовскиот државјани. „Нашето Министерство за правда е во комуникација со Владата на Македонија за да дознаеме повеќе за косовскиот државјанин кој се наоѓа таму во притвор и дека нема да дојде до потчинување на агресивноста на Србија кон Косово што се рефлектира преку потерниците за апсење за нашите граѓани“, изјави Курти.
