Според пресудата на судот во Свети Николе, Ацо Велковски како градоначалник на Општина Лозово во периодот од декември 2019 година до декември 2020 година со повреда на законите за совесно постапување при вршење на функцијата и со пропуштање на должен надзор несовесно постапувал со имотот на општината.
„Во својство на службено лице-градоначалник на Општина Лозово со повреда на законите за совесно постапување при вршење на функцијата и со пропуштање на должен надзор несовесно постапувал во вршење на своите овластувања и должности на начин што, откако со решение од јуни 2019 година на Агенцијата за финансиска поддршка на земјоделието и руралниот развој (АФПЗРР) на Општина Лозово било одобрено барањето за финансиска поддршка во износ од 2.285.044 денари, на 12 ноември 2019 година склучил договор за јавна набавка помеѓу општината како нарачувач и фирма од село Василево како изведувач, по што на 27 декември 2019 година со АФПЗРР склучил договор за реализација на инвестицијата по проект до 31 декември 2020 година, како услов за исплата на финансиските средства за поддршка на истиот, па обвинетиот во неколку наврати во јануари, јуни, август и ноември 2020 година како и во март 2021 година не постапил со сопственоста на општината како добар домаќин и без основа го продолжувал рокот за извршување на работите кои биле предмет на јавната набавка со склучување на неколку последователни анекси на договорот со кои рокот за изведување на работите бил продолжен до 5 мај 2021 година со што постапил спротивно на договорот за финансиска поддршка и спротивно на статутот на Општина Лозово и со тоа го пропуштил рокот за поднесување на барање за повлекување на одобрените парични средства од АФПЗРР со што ѝ нанел значителна штета на Општина Лозово од 2.285.044 денари, пари кои биле наплатени од општината, а по предлог на фирмата изведувач на работите“, се наведува меѓу другото во пресудата на Основниот суд Свети Николе.
Воедно судот го задолжил Велковски да ѝ ја плати на општина Лозово штетата од 2.285.044 денари, штета што ја предизвикал со своето несовесно работење како и да ги надомести сите трошоци на постапката.
Велковски ѝ стана познат на пошироката јавност кога во минатото беше обвинет за мобинг од страна на две жени од општината нешто кое што тој го демантираше и тврдеше дека и двата случаи му се наместени. Контровезрите врзани околу тогашниот градоначалник на Општина Лозово, Ацо Велковски продолжија и кога бремена жена избрка од работа како и кога на крајот на 2020 година неговата ќерка стана добитник на шпорет како празнична наградна игра организирана од општината. Тогаш оттаму кажаа дека шпоретот ќе биде дониран во хуманитарни цели.
