Манифестација која е востановена пред пет години по иницијатива на здружението „Вина од Македонија“, а во соработка со регионални здруженија и винарници. Главната цел на обележувањето на Денот на вранецот е да се интернационализира оваа регионално присутна автохтона сорта и да се промовираат нејзиниот квалитет и карактеристики на меѓународната винска сцена. Одбележување на денови на регионални вински сорти не е ништо ново за балканскиот регион – за само една недела, на 14 октомври 2023, се обележува Денот на прокупецот. Со одржување континуитет на вакви настани, важни за македонската винска индустрија, се промовира земјата како конкурентна винска земја, достојна на признание во винскиот свет.
Како што понатаму велат од здружението, во декември за прв пат ќе се одржи натпревар „Вранец селекшн“ (Vranec Selection) во рамки на познатиот натпревар „Concours Mondial de Bruxelles“.
„По само пет години ги гледаме првичните плодови од заедничката работа – значајно е зголемен извозот на македонско вино, а подобрена е неговата вредност како резултат на пласманот на флаширани вина со висок квалитет. Но, сето ова е само дополнителна мотивација да продолжиме да работиме на зголемување на квалитетот на грозјето и на вината, и на создавање свест за компаративните предности на нашето вино, правејќи го препознатливо и присутно на странските пазари“, рече претседателот на „Вина од Македонија“, Светозар Јаневски, истакнувајќи дека „токму вранецот е сортата која го има најдобриот потенцијал за исполнување на оваа мисија – тој е своевиден амбасадор на нашиот регион во винскиот свет, бидејќи, покрај другото, ги обединува интересите на винските индустрии во земјите на Западен Балкан“.
На панел дискусиите своите искуства за пласманот на виното на странските пазари ги презентираа претставници на значајни винарници и вински дистрибутери, додека енолозите кои секојдневно работат и креираат вина од вранец споделија интересни видувања од аспект на производството и предизвиците со кои се соочуваат во својата работа.
Настанот беше поддржан од Министерство за шумарство и водостопанство.
„За нас како министерство и Влада, лозарството и винарството се едни од најважните сектори. Низ сите овие години тоа повеќе пати и во дело сме го докажале, посветувајќи сериозно внимание, креирајќи мерки и политики за поддршка и развој на лозарството и винската индустрија, како и силна домашна и меѓународна промоција на нашето убаво македонско вино. Мерките кои сите овие години заедно ги создаваме за развој на овие два сектора веќе ги даваат своите резултати. Тоа се факти и бројки со кој треба да се гордееме. Македонското вино се искачи на 13 место во светот по остварен девизен прилив од извоз на вино. 13 земја во светот во натпревар меѓу многу поголеми земји е за голема почит. Ова е нашата најголема национална гордост, најголемо признание за сите мерки и политики кои беа преземени во изминатиот период“, изјави министерот Љупчо Николовски.
Здружението „Вина од Македонија“ во изминатите пет години иницираше и спроведе неколку значајни проекти со цел развој и промоција на македонското вино и негово соодветно позиционирање. „Иницирани се значајни проекти за меѓународно препознавање на вранецот и негово позиционирање на светскиот вински пазар. Основана е асоцијацијата Балкански вина со поддршка од ФАО и ЕБРД, дефинирање на стратегијата за лозарство и винарство, а со поддршка на Германската агенција за меѓународна соработка (GIZ) и програмата DeveloPPP започнат е значаен проект за дефинирање на Географски Ознаки и поконкретно развој на Тиквешкиот регион како најзначаен вински регион во државата”, изјави Елена Младеновска Јеленковиќ, извршен директор на здружението.
Иако се смета дека вранецот потекнува од Црна Гора, а го има во сите земји во регионот, оваа сорта е најзастапена во нашата земја, со околу 50-тина проценти од вкупните лозови насади и со речиси 70% од црвените сорти. Од него се произведуваат суви вина со единствен, препознатлив вкус и карактер кои се синоним за балканскиот регион. Вината произведени од вранец се меѓу најнаградуваните македонски вина на најголемите и реномирани светски вински натпревари.
