Министерот за економија е убеден дека ќе се изнајдат други алтернативи за снабдување со природен гас. На дел од нив се работи, како што нагласи, тоа се новиот интерконектор со Грција, директното учество во Александропулос и интерконекторот со Бугарија.
Бектеши рече дека утринава разговарал и со гувернерката на Народната банка и дека уште нема насока од Европската централна банка бидејќи во нашата курсна листа ја нема рубљата како валута и не може да се прават такви трансакции.
Во однос на лиценцата на БЕГ и дали таа ќе биде одземена по потфрлањето на оваа компанија во екот на грејната сезона, Бектеши рече дека тоа не е надлежност на Министерствто за економија, но доколку по завршување на договорот меѓу ЕСМ и БЕГ, не се исполнуваат условите, тогаш сигурно ќе се постапи според законските прописи.
