„Се прават сите анализи за поместување на трасата за брзата пруга. Ние не се откажуваме од 12-те хидроцентрали на реката Вардар. Но за сето ова да се искоординира потребна е сериозна анализа која во моментов се прави заедно со Министерството за транспорт“, изјави денеска министерката Сања Божиновска.
И за проектот Чебрен, Божиновска вели дека определбата на Владата е тоа да биде македонска инвестиција, да биде македонски проект. Но и за ова се прават сериозни процени за оптоварувањето на буџетот во наредните години.
Божиновска на прес-конференција по повод една година од основањето на Министерството посочи дека во изминатата година изградиле институција што ја движи енергетиката, а особено го истакна значењето на новиот Закон за енергетика.
Донесен е десетгодишен план за развој на преносната мрежа, воведена е методологија за енергетска сиромаштија, обезбедена е забрана за исклучување на струја во зимските месеци за ранливите домаќинства. Исто така, лани 7000 семејства добиле ваучери за инвертер клима-уреди, а годинава ќе бидат обезбедени 60 милиони денари за поддршка на лицата со попреченост и нивните семејства.
Од Министерството најавуваат дека до крајот на годинава ќе се донесат закони за обновливи извори, за енергетска ефикасност, за јавно-приватно партнерство, за геологија и рударство со кој првпат се заштитува македонскиот рубин како национално богатство.
Во првиот квартал од годинава се наплатени 247 милиони денари за експлоатација на минерални суровини, двојно повеќе од лани.
Една година по основањето, Министерството за енергетика има 109 вработени, 53 жени и 56 мажи.
