„По трагедија во Велес која можеше да биде спречена, бараме итно разрешување на цело СВР Велес и одговорност од Панче Тошковски“, изјави пред Министерството за внатрешни работи Зана Џаферовска од Форумот на жени на СДСМ.
Таа нагласи дека осудата и одговорноста за овој случај не се прашања на политика, туку на човечки и етички норми. Според изнесеното, жртвата повеќепати барала заштита, пријавувала закани, насилство и кражби, а во медиумите се споменува дека имало над 70 пријави. „Полицијата знаела, социјалните служби знаеле, институциите не мрднале со прст. Страшно и болно истовремено“, додаде Џаферовска.
Од Форумот на жени порачаа дека институциите не успеале да го заштитат животот на жената и уште еден човек, а поради нивното молчење и непреземање мерки, згаснале два човечки животи.
„Ова е порака до сите нас дека системот потфрли. А кога системот не ги штити жените, тогаш мора да има одговорност и тој систем мора да се промени од корен. Жените во Македонија не смеат да живеат во страв за својот живот и за својата безбедност, само затоа што нивните пријави ќе завршат во некоја фиока“, рече Џаферовска.
Таа додаде дека денешниот протестен собир е порака: „Доста е! Уште колку човечки животи треба да згаснат за Тошковски да понесе одговорност?“
