„Сѐ уште разговараме, но според мене извесно е дека ЗНАМ ќе има кандидати за градоначалник во Куманово и во Општина Центар и дека ќе бидат поддржани од нашиот коалициски партнер ВМРО-ДПМНЕ, а дополнително СДСМ веќе го објави нивниот кандидат и за Куманово и за Центар. Тоа е само дел од разговорите, разговараме и за други општини, за коишто се вршат сондажи и мерења и верувам дека во втората половина во месецот август ќе ги објавиме точно кои се и сите кандидати“, изјави вечерва Димитриевски за Сител.
Вели дека неговото име за кандидат за градоначалник на Куманово е соопштено на последната прес-конференција на партијата иако формално партиските процедури се уште не се завршени, додека за Центар рече дека има поголем број кандидати за кои е направено едно мерење, како и дека сега во тек е ново мерење.
Потврди дека еден од кандидатите за кои се испитува јавното мислење за градоначалник на скопската општина Центар е заменик министерот за енергетика Мирослав Лабудовиќ.
Димитриевски кажа дека очекува поддршка од владиниот партнер ВМРО-ДПМНЕ за нивните кандидати за градоначалници и оти ќе го повика членството на ЗНАМ да ги поддржи кандидатите на ВМРО-ДПМНЕ во Скопје и во другите градови.
За поддршка од Вреди рече дека ЗНАМ нема договор со нив туку со ВМРО-ДПМНЕ, но, додаде дека, секако дека постои можност за разговор на таа тема бидејќи просторот за соработка со ДУИ е затворен се додека не видат „ново реформирано ДУИ, со нови имиња, со нови кадри“.
За обвинувањата од кандидатот на СДСМ Мартин Костовски дека општина Куманово добила најмал износ од Владата од 400 милиони денари, Димитриевски рече дека тоа се собирање на евтини политички поени, како и дека Куманово од Владата добила над 800 милиони денари за 27 инфраструктурни проекти во градот и дека за дел од нив е потребно да се издадат градежни дозволи.
„Ние ќе продолжиме со позитивен тренд, а нив како опозиција им останува да критикуваат“, рече тој додавајќи дека СДСМ е веќе прочитана книга.
ЗНАМ, рече Димитриевски, на овие избори настапува самостојно со советнички листи, нова политичка партија е и секои избори за партијата се корисни за да се провери меѓу граѓаните.
„Што се однесува до кандидат за градоначалник треба да имате лице кое е општо прифатливо за граѓаните бидејќи не секогаш партиската припадност е пресудна, туку името и презимето на личноста бидејќи граѓаните гласаат за човек а дополнително гласаат за партија. Партиската поддршка е неминовна“, рече тој.
Лидерот на ЗНАМ Димитриевски вели дека на овие избори ќе се знае до каде е ЗНАМ и дека очекува поголема поддршка во однос на парламентите избори.
Одговарајќи на прашање за интерпелацијата на јавниот обвинител Љупчо Коцевски, која е на дневен ред на утрешната седница рече дека пратениците од ЗНАМ ќе ја поддржат и дека тие се за спроведување на реформите во правосудството.
Наспроти ова, премиерот Христијан Мицкоски денеска изјави дека разговорите со владиниот партнер ЗНАМ за кандидати за градоначалници за Куманово и Општина Центар се движат во позитивна насока, но дека конечната одлука ќе биде донесена по 15 август.
„Преговараме со ЗНАМ во моментов за две општини – Куманово и Општина Центар да имаме заеднички кандидат. Разговорите се водат во позитивна насока, но повеќе информации ќе имаме по 15 август како што претходно кажав во една прилика затоа што сеуште траат анализите во општините каде имаме добри кандидати. Мораме после 15-20 август уште еднаш да измериме и во рамки на граѓаните и во рамки на партиската база за да дојдеме до најдоброто решение што ќе го понудиме, рече Мицкоски“, одговарајќи на новинарски прашања по пуштањето во употреба на затворениот базен во училиштето „Невена Георгиева-Дуња“ во Кисела Вода.
За преговорите со другиот владин партнер Вреди, како што изјави, имаат принципиелен договор да се поддржуваат во општините каде едната или другата коалиција ќе има кандидат.
