На скопскиот аеродром кај патник кој требало да патува за Лондон биле пронајдени 260 пакувања од по 50 грама тутун.
Возач на камион се обидел во државата преку граничниот премин Табановце да шверцува соларен инвертер. Во обидот е спречен од Службата за мобилен скенер која при извршената контрола утврди дека во кабината има неправилности по што е извршен и физички преглед кога е пронајден соларниот инвертер.
На Табановце во куферите на еден од патниците кои патувале со автобус кој сообраќал на релација Скопје – Белград цариниците пронајдоа 129 парчиња суплементи Zeo Medic, додаток во исхрана. Суплементите се запленети, а против патникот ќе биде поведена соодветна постапка.
Спречен е и обид за шверц на 3.150 ќесички маџун со додатоци, откако патник се обидел истите преку граничниот премин Богородица нелагално да ги внесе во државата. Лицето кое патувало со автомобил на прашање дали има нешто да пријави за царина одговорило дека нема ништо за пријавување. Поради сомневање возилото е селектирано за детален преглед при што во багажниот простор во три патнички куфери помеѓу личните предмети, е пронајдена непријавената стока.
Мобилен царински тим на Царинска испостава Табановце при контрола на камион, заплени 463 парчиња облека со потписот на Ралф Лорен, Диор, Бос и други модни брендови поради основано сомневање за повреда на право од интелектуална сопственост.
На преминот Ново село патник се обидел да шверцува разна стока, меѓу која ножеви, клучеви, рибарски прибор, слушалки, машинка за стругање. Во намерата е спречен од царинските службеници кои при контрола на возилото, во багажникот и помеѓу седиштата ја открија непријавената стока, соопшти Царинската управа.
