До 13 часот се регистрирани вкупно 15 пожари. Од нив, седум се сè уште активни, четири се под контрола, а четири се изгаснати.
Според ЦУК, активни пожари има во општините Василево, Радовиш и Берово – на планината Голем Готен и во Малешевските Планини, каде што гори нискостеблеста шума, смрека, грмушки и ниска вегетација. Активен е и пожарот во село Грешница во општина Македонски Брод, каде што гори мешана шума и сува трева, како и пожарот помеѓу селата Локвица и Крапа, со деградирана дабова шума и ниска вегетација. Пожар има и кај село Бешиште во Прилеп, на местото Бешишки Рид, каде што гори ниска вегетација. Други активни жаришта се регистрирани помеѓу селата Церово и Групчин во општина Желино, во близина на тунелите на автопатот Е-75 кај Демир Капија и кај село Оризаре во Липково.
Под контрола се пожарите кај село Латово во Македонски Брод, помеѓу селата Шурленци и Езерани во Ресен, во атарот помеѓу Царевиќ и Смолани кај Прилеп, како и на потегот од село Штавица кон Чумово, Волково и Прилепец.
Целосно изгаснати се пожарите кај село Николиќ во Дојран, кај село Беловиште во Гостивар, на потегот Џидимирци – Крушје – Иванковци во Велешко, како и во село Речица кај Куманово.
Од ЦУК нагласуваат дека сите служби остануваат на терен и ги следат состојбите со цел навремено интервенирање и целосно локализирање на преостанатите пожари.
