„Овие снимки се скандалозни, а односот на Дехари на нив е понижувачки за секоја жена. Тоа не е само навреда кон жените во Кичево, туку и кон сите жени во Македонија – без разлика на етничката припадност“, изјави Ангелова, додавајќи дека ваквото однесување претставува срам за општеството и мора да биде јавно осудено.
Според ВМРО-ДПМНЕ, на снимките се слуша како вработените жени биле принудувани да го бакнуваат градоначалникот и да му седнуваат во скут.
„Ова е изживување врз цел колектив и врз сите жени. Зарем до тој степен е падната ДУИ, да за вакви луѓе води кампања за повторен мандат?“, праша Ангелова, додавајќи дека Кичево и кичевчани не заслужуваат ваков третман кон жените на работните места.
Од партијата побараа реакција и од женскиот форум на ДУИ, од Комисијата за заштита од дискриминација, како и од лидерот на партијата Али Ахмети.
„Ова не смее да помине без широка општествена осуда. Жените не се ничија сопственост, тие се нечии мајки, ќерки и жени, и не заслужуваат вакво понижување“, порача Ангелова.
