„Тоа е битка на нашата генерација и мора да се справиме со нелегалното приредување на онлајн игри на среќа. Затоа што е пандемија којашто ги зафаќа сите граѓани, особено таргет се младите, бидејќи не можат да играат исгри на среќа со лична карта, ги земаат документите на своите родители и нелегално се приредуваат игри на среќа. Потоа имаме украдени пари, банкарски податоци, украдени банкарски картички итн…“ изјави Андоновски кој во Свети Николе одговараше на новинарско прашање, како тече процесот на затварње на онлајн приредувачи на игри на среќа, кои работат нелегално.
Посочува дека секој месец имаат активности и процесот трае во континуитет. Очекува до крајот на месецот забрана за уште 50 онлајн приредувачи на игри на среќа без лиценци. Министерот Андоновски забележува дека на овој начин се заштитуваат и младите луѓе како што рече „од овие предатори на интернет“, а на коишто им е целта да ги украдат податоците на граѓаните, а потоа и да ги злоупотребат.
Тој денеска уште изјави дека Системот на интегрирано планирање на ресурсите (ИПР систем) ќе биде систем на кој можеме да му веруваме.
Системот на интегрирано планирање на ресурсите (ИПР систем) две години бил оставен без одржување, но од јануари интензивно се работи на негово подобрување. Со внимание ги следиме забелешките од Државниот завод за ревизија и одејќи по тие забелешки, ќе имаме одлични резултати. Ќе имаме систем на кој можеме да му веруваме и кој ќе им биде достапен и на институциите надвор од Службата за општи и заеднички работи (СОЗР), како агенции, општини,… кои материјалното финансиско работење го прават сѐ уште хартиено, „пешки“, рече денеска министерот за дигитална трансформација Стефан Андоновски.
Според Андоновски, системот е веќе во функција, а модулите – како што ќе се развиваат, така ќе бидат објавувани во јавност.
„Излезе извештајот на Државниот завод за ревизија. Ситемот, за жал, две години бил оставен без одржување. По склучувањето на договорот во јануари годинава почнавме сериозен акциски план за надминување на недостатоците. Направени се и безбедносни тестирања и заштита на корисници и на податоци, а сега се тестира и поврзувањето со официјалните службени меил адреси на сите корисници. Со завршување на овој пакет ќе имаме систем на кој можеме да му веруваме. Овој систем ќе им биде достапен на институциите и надвор од СОЗР, агенции, општини кои материјалното финансиско работење го прават хартиено, „пешки“, со меил. Сега ќе може да го работат преку нашиот систем“, напомена министерот, одговорајќи на новинарско прашање по пуштањето во функција на новата канцеларија за административни услуги на територија на oпштината, „ЕТУ Свети Николе”.
Тој најави и дека системот ќе биде поврзан со трезорското работење.
„Ние тестиравме оваа недела во нашето Министерство. Нам веќе не ни се потребни сметководителите од СОЗР зашто нашите вработени во Секторот за финансии сами ги прават пресметките и во следната фаза би сакал, за да ја оптимизираме работата на СОЗР, секоја институција, министерство, само да ги прави пресметките и се надевам дека со развивањето на овие модули уште повеќе ќе ја подобриме работата на системот“, истакна Андоновски.
ДЗР во извештајот објавен завчера констатира дека не се одржува системот што треба да го следи финансиското работење на 40 државни институции, како и дека кај нив нема навремено и комплетно дигитално следење на сметководствено-финансиските услуги, вклучувајќи и десет министерства преку кои минуваат речиси 19 проценти од државниот Буџет.
