„Нашето работење ќе биде сведено на минимум или со загуба. Затоа ги повикувам сите засегнати страни разумно да пристапат кон овој проблем за кој и ние самите сме свесни“, вели Кемал Муриќ, претседател на Синдикатот на приватните автобуски превозници на град Скопје. Тие додаваат дека ова зголемување на минималната плата од 200 евра за нив ќе биде можно само со субвенционирање од државата.
„Изразуваме голема загриженост во однос на барањето на Сојузот на синдикатите на Македонија за покачување на минималната плата од 200 евра. Ние сме микрофирми со еден до двајца вработени и во изминатиот период имавме низа проблеми со исплатата на надоместоците што требаше да ни ги плаќаат во Град Скопје, особено во времето на градоначалничката Данела Арсовска, со која до ден-денеска имаме судски спор поради нејзините одлуки за неисплата на дел од долгот. Во насока на тоа бевме принудени да земеме кредити за да можеме да ги сервисираме нашите обврски кон граѓаните на град Скопје. Во случај на покачување на минималната плата од 50 проценти би дошле во ситуација во која повеќе нема да можеме да возиме и ќе бидеме принудени да ги откажеме договорите затоа што работењето ќе биде сведено на минимум или со загуба“, вели Муриќ.
Друго решение е, вели Муриќ, зголемување на цената на автобускиот билет.
И од Синдикатот на автотакси-превозниците на град Скопје велат дека зголемувањето на платите може да се случи само со државна субвенција или со зголемување на цената на услугата.
