Вечерва од протестот во Аеродром пред мостот Близнак беше соопштено дека засега нема одговор од централната и од локалните власти на барањата на иницијативата поврзани со целосно затворање на депонијата Вардариште кои беа испратени во саботата.
„Доколку и на ова, второ по ред барање, не биде добиен одговор најдоцна до крајот на утрешниот ден, во петок ќе биде организирана блокада и во утринските часови на истото место пред мостот во Аеродром, а секојдневната блокада од 18 до 19 часот останува во сила“, велат од Стоп за Вардариште.
Од Стоп за Вардариште потсетија дека борбата за чист воздух нема да запре сѐ додека не се остварат барањата за целосно затворање на Вардариште, негово оградување и обезбедување. Иницијаторите ги канат градоначалниците да дојдат на протест, да ги слушнат граѓаните и да ги изнесат своите видувања и планови како да се остварат нивните одамна искажани ветувања во однос на депонијата и за обезбедување чиста животна средина.
„Протестите немаат париски бои туку се резултат на гнев што за основното човеково право за чист воздух се нема волја кај надлежните органи и власти“, беше уште еднаш кажано во дебата со граѓаните.
