Основното јавно обвинителство за гонење на организиран криминал и корупција (ОЈО ГОКК), постапувајќи по кривичната пријава поднесена од МВР вчера донесе наредба за спроведување истражна постапка против началникот на Секторот за урабанизам на Општина Маврово-Ростуше, Седредин Елезовски. Тој се сомничи дека од почетокот на годинава во повеќе наврати директно побарал и примил поткуп за себе и за други лица за да завршат работа која што по закон биле должни да ја извршат.
Според кривичната пријава поднесена од МВР, Елезовски завчеравечер договорил средба со оштетениот граѓанин кој на средбата му дал 2.000 евра, кои Елезовски ги примил и на лице место бил фатен од страна на полицијата.
„Осомничениот во два наврати директно побарал од подносителот на барањето паричен износ од 16.000 евра, а потоа износот во понатамошните средби со оштетениот го намалил на 13.000 евра, за да тој и комисијата што одлучувала во управна постапка по барањето за издавање на урбанистички проект постапат по барањето на оштетениот. Дел од парите наводно биле за другите службеници вклучени во управната постапка за да одлучат во побрз рок. Со оглед дека било договорено парите етапно да бидат исплаќани како што ќе се одвива управната постапка, осомничениот за првото дејствие побарал износ од 4.400 евра“, информираше вчера ОЈО ГОКК.
Истрагата треба да покаже дали и колкумина други евентуално примиле поткуп за работи што како службени лица морале да ги извршат, но за тоа претходно побарале поткуп.
МКД.мк веќе пишуваше дека во последните пет месеци Медат Куртовски, градоначалникот на Општина Маврово Ростуше, потпиша триесетина решенија, потврди за градби вон урбанистички планови за изградба на разни објекти, хостели, пансиони и згради со апартмани околу Мавровското Езеро, а ваквите предмети претходно поминале преку Комисијата за урбанизам на општината, а таму членува Садредин Елезовски, началникот на Секторот за урбанизам на општината кој завчера во Скопје беше фатен како прима мито.
„
