Пред момците на Кире Лазаров е нов предизвик, селекцијата на Катар која во минатото коло против Холандија ја покажа својата моќ иако го загуби мечот. Тој пораз беше претрпен со гол во последната секунда од мечот. Катарците на ова Светско првенство го победија само Кувајт, но одиграа неколку мечеви каде покажаа дека се силна селекција. Вујовиќ на располагање има искусни ракометари каков што е Жарко Марковиќ кој во минатото настапуваше и за Металург.
Македонија во денешниот меч важи за благ фаворит, но се очекува нов изедначен натпревар и борба до последните секунди од мечот.
Кире Лазаров ги има сите ракометари на број, нема повреди, но можеби кај некои играчи се чувствува замор од интензивните настапи кои се типични за големите ракометни турнири.
„Катар имаше одлични натпревари на Светското првенство. Борбена селекција со многу натурализирани играчи кои прават разлика на теренот. Не очекува уште еден неизвесен натпревар. Очекувам уште еднаш да бидеме на високо ниво. Ќе видиме дали тоа ќе биде доволно за позитивен резултат“, вели Кире Лазаров.
Победа на денешниот натпревар е важна за колку што е можно повисоко место во генералниот пласман.
И на денешниот натпревар се очекува скромна посета на салата во Вараждин, далеку помала од онаа која беше во првите три кола.
