„Во случај кога Комисија за оценка на работната способност оцени дека работникот е способен за работа, правото на времена пензија на работникот му се укинува, но поради неможноста да се врати на своето работно место, тој станува финансиски необезбеден или потенцијален социјален случај. Голем број на работници, се жалат дека оваа комисија многупати донесува одлука за укинување на правото на времена пензија и покрај тоа што работникот не е оспособен да се врати на работното место и да ги извршува работните задачи“, се наведува во соопштението на Левица.
При тоа, од партијата прават споредба дека Законот за работни односи предвидува мирување на работниот однос за лица кои се избрани на државни или јавни функции или при упатување на работа во странство, но не содржи одредби за мирување на работниот однос во случај на професионално или друг вид на заболување.
„Како социјална држава, Република Македонија има уставна обврска да се грижи за обезбедување на услови за живот за сите граѓани подеднакви, особено за лица кои се во социјален ризик. Владеењето на елитистичките касти од ДПМНЕ и СДС, повеќе од триесет години покажа постојано ускратување на работничките права и зголемување на функционерските привилегии. Во насока на заштита на егзистенционалните права на работниците, Левица најавува дека покрај измените во ЗРО со кои се бара враќање на патните трошоци на работниците, ќе интервенира и во други членови од овој закон со цел заштита на работничките права, вклучително и регулација на овие правни празнини, кои дозволуваат егзистенцијата и преживувањето на работникот да зависи од волјата на една комисија“, велат од Левица.
