Три години, тим на истражувачи од Универзитетската клиника Хамбург-Епендорф (УКЕ) работеше на проектот. Сега тоа стана реалност. Со помош на специјален 3Д печатач сега можат да произведуваат лекови по мерка на пациентот – во индивидуално прилагодени дози, пренесува Дојче веле.
Како што објаснува лидерката на истражувачката група, Клаудија Лангебрејк, снабдувањето со лекови во педијатријата, особено за тешко болните деца, не е секогаш едноставно. Заедно со своите колеги, таа разви иновативна процедура:
„Го правиме ова затоа што имаме посебни пациенти. Оваа студија се фокусира на лекови за деца. Сите знаеме дека многу лекови се горчливи и преголеми за да се проголтаат, а децата често не можат да ги земат“.
Целта на истражувањето, кое Лангебрејк го спроведува заедно со фармацевтот Адрина Дадка, е да им олесни на тешко болните деца да ги земаат своите лекови.
Во оваа пионерска студија во Германија, болничките фармацевти издаваат дексаметазон, лек кој се користи кај деца заболени од рак. Овој лек им помага на малите пациенти кои се подложени на интензивна хемотерапија, намалувајќи ја мачнината и дозволувајќи им да ја задржат храната во нивните тела. Без лекот, децата може да изгубат премногу тежина за време на третманот.
Студијата, која сега започна и ќе трае до крајот на 2026 година, ги следи децата низ два циклуса на лекување: во првиот добиваат стандардни таблети, а во вториот индивидуално печатени таблети за џвакање.
Целта е да се тестира колку таблетите се прифатливи за пациентите и колку се безбедни за терапија, нагласува Клаудија Лангебрејк.
Стандардните таблети, вклучително и дексаметазон, обично се достапни во дози наменети за возрасни, но не и за деца.
За да се обезбеди соодветна доза за децата, таблетите мора да се исечат, поделат или прецизно да се измерат. Ова е голем проблем за родителите, објаснува детскиот онколог Александар фон Хуго кој го води истражувањето на Универзитетот во Хамбург.
„Речиси секој ден морам да разговарам со родителите за прецизното дозирање на лековите. За многумина од нив правилното преземање на терапијата е дополнителен предизвик, заедно со борбата против туморот“.
Фармацевтот Адрин Дадка го демонстрира процесот. Голем пластичен шприц се полни со црвена маса која содржи дексаметазон и помошни материи, кои овозможуваат рамномерна распределба на активната супстанција и ја даваат посакуваната густина, т.е. структура на таблетата. Оваа мешавина, која ја нарекуваат „мастило за печатење“, има цврста конзистентност на собна температура – како гумени бонбони. Кога смесата ќе се загрее во главата на 3Д печатачот, се топи и може прецизно да се нанесува слој по слој.
Така се создаваат тродимензионални таблети – во форма на срца, ѕвезди или класични тркалезни таблети. Финалниот производ е малку помек од гумени бонбони, но не е мрсен и лесен за џвакање. Таблетите се со црвена боја и имаат мирис на малина. Затоа се попривлечни за децата.
Детскиот онколог Александар фон Хуго смета дека проектот е револуционерен. „Ако овој пристап продолжи да функционира, тоа би било вистинска револуција во педијатријата. Ако можеме да произведеме лек во вистинска доза и со пријатен вкус, за децата да можат без проблем да го земаат дома, тоа би било огромна помош“.
Оваа технологија нема да биде ограничена само на педијатрија. Доколку се покаже како успешна, може да се примени и во други области од медицината. На пример, пациентите со Паркинсонова болест или деменција често имаат проблеми со голтање лекови. Поединечно печатените таблети би можеле да ја олеснат нивната терапија и да го подобрат нивниот квалитет на живот.
Лековите од 3Д печатач би можеле да станат нов стандард во медицината во иднина. Овој иновативен пристап не само што го олеснува лекувањето на тешко болните пациенти, туку и ги прилагодува лековите на индивидуалните потреби. Доколку студијата биде успешно завршена во 2026 година, персонализираната медицина би можела да доживее вистинска револуција, правејќи ги терапиите поефикасни и полесни за пациентите од сите возрасти.
