Лазаров: Ве молам, без еуфорија сега

„Можеби резултатот не кажува така, но ова беше тежок меч за нас. Исто така, ова е и огромен успех. Не само што ја добивме Чешка, туку и против Шведска и против Германија покажавме дека можеме да им парираме. Ме радува нешто друго – не се посрамотивме ниту еднаш, игравме како голема репрезентација, и тоа трет меч по ред. Можеби забележавте, на сите три натпревари досега играчот на мечот беше од нашиот табор, со Шведска – Алушовски, со Германија – Стоилов, а вечерва – Миркуловски. Се надевам дека така ќе продолжиме понатаму – да се редиме еден по еден. За идните натпревари не сакам да губиме глава, мора да се средиме во мислите, да не се залетуваме како во Задар, кога цела Македонија дојде да нè бодри и се посрамотивме. Тоа беше лошо искуство. Битно е да се смириме, да сме здрави и живи, машки да се бориме и понатаму, да играме како што треба, да знаеме што сакаме и гарантирам дека ќе има уште радости. Но предупредувам, најдобро е да одиме без еуфорија“, вели големиот Кире.