Русија сигнализираше дека доколку не се исполни списокот на барања за отстранување на пречките за нејзиниот извоз, таа нема да се согласи да го продолжи договорот по 18 мај, а со кој се овозможува безбеден извоз на житарки за време на војната од украинските црноморски пристаништа.
Едно од барањата на Русија е Руската земјоделска банка (Росселхозбанк) да се врати во банкарскиот систем СВИФТ. Лавров рече дека нема планови тоа да се случи и како алтернатива Гутереш предложи американските банки да ѝ помогнат на руската банка во трансакциите.
Лавров потврди дека една банка „љубезно се согласила да финансира една операција“, но дека тоа не е долгорочно решение. Извор запознаен со трансакцијата рече дека американскиот Стејт департмент и Министерството за финансии на САД побарале од „ЈПМорган Чејс“ да спроведе „многу ограничена и високо набљудувана“ трансакција поврзана со извозот на земјоделски материјали, што се случи овој месец.
Изворот рече дека може да има дополнителни трансакции, пренесува Ројтерс.
На прес-конференција во Обединетите нации, на која беа опфатени повеќе теми, тој рече дека во догледно време ќе има реакција на писмото испратено од шефот на ОН Антонио Гутереш до рускиот претседател Владимир Путин за договорот за жито.
Договорот со ОН помогна да се убеди Русија да дозволи украински црноморски извоз на жито според договорот, исто така посредуван од ОН и Турција во јули минатата година, со цел да се справи со глобалната прехранбена криза, за која претставниците на ОН велат дека е влошена со инвазијата.
„Никому не му треба трета светска војна, но се чини дека некој е подготвен да оди до самиот крај“, рече Лавров, пренесе Ројтерс.
Запрашан за новинарот на Вол Стрит Журнал, Еван Гершкович и поранешниот маринец Пол Вилан, кои се затворени во Русија и дали би можело да се случи размена на затвореници, Лавров рече дека постои посебен, нејавен канал за да се разговара за размена на затвореници со Соединетите Држави.
