Властите на Србија сопреле автобуси со косовските регистрации на границите со Хрватска и со Унгарија, „во знак на одмазда“ поради поддршката на Парламентарното собрание на Советот на Европа за членство на Косово во таа организација. Ова го порачаа приштинските власти, кои ги повикаа косовските граѓани „по секоја цена“ да ја избегнуваат Србија.
„Еден ден откако во Парламентарното собрание се гласаше во корист на Косово за членство во Советот на Европа, Србија им возвраќа на косовските цивили. Од утринава над 300 наши граѓани, вклучувајќи деца, се притворени на границата, без храна и лекови“, напиша Курти на социјалната мрежа Икс.
A day after @PACE_News voted in favor of 🇽🇰 membership in @coe, Serbia retaliates against 🇽🇰 civilians. Since this morning, over 300 of our citizens—incl. children—have been arbitrarily detained at the border, deprived of food & medication. A gross violation of human rights!
— Albin Kurti (@albinkurti) April 17, 2024
Министерството за внатрешни работи на Србија објави дека тврдењата за задржување автобуси се „неосновани“ и дека полицијата „никого не задржувала ниту спречувала влез и премин на кој било граѓанин“ од територијата на Косово.
„Во тек е засилена контрола на сите патници на граничните премини и се вршат безбедносни проверки, а сè со цел за поголема безбедност на граѓаните, што може да предизвика подолго задржување на самиот граничен премин“, наведе српската полиција.
Србија се противи на членството на Косово во Советот на Европа, а министерот за надворешни работи Ивица Дачиќ по гласањето порача дека ќе ја продолжи својата борба „со сите сили“ за таа одлука да не биде усвоена.
